தமிழக அமைச்சரவையில் இருந்து வி.மூர்த்தி விடுவிப்பு : பால்வளத்துறை அமைச்சராக B.V.ரமணா நியமனம் – முதலமைச்சர் பரிந்துரையை ஏற்று, ஆளுநர் மாளிகை அறிவிப்பு

தமிழக அமைச்சரவையில் இன்று மாற்றம் செய்யப்பட்டுள்ளது. பால்வளத்துறை அமைச்சர் திரு.வி.மூர்த்தி விடுவிக்கப்பட்டு, அவருக்கு பதிலாக திரு.B.V.ரமணா அமைச்சரவையில் சேர்க்கப்பட்டுள்ளார். 

தமிழக ஆளுநர் மாளிகை இன்று வெளியிட்டுள்ள செய்திக் குறிப்பில், அமைச்சரவையில் இருந்து பால்வளத்துறை அமைச்சர் திரு.வி.மூர்த்தி விடுவிக்கப்பட்டுள்ளதாக தெரிவிக்கப்பட்டுள்ளது. 

திருவள்ளூர் தொகுதி சட்டமன்ற உறுப்பினரான திரு.B.V.ரமணாவை, அமைச்சரவையில் சேர்த்துக்கொள்வதற்கான முதலமைச்சர் செல்வி ஜெ ஜெயலலிதாவின் பரிந்துரையை ஆளுநர் ஏற்றுக்கொண்டதாகக் குறிப்பிடப்பட்டுள்ளது. 

முதலமைச்சரின் பரிந்துரைப்படி, திரு.வி.மூர்த்தி இதுவரை வகித்துவந்த பால்வளத்துறை திரு.B.V.ரமணாவுக்கு ஒதுக்கப்பட்டு, அவர் பால்வளத்துறை அமைச்சராக பதவி வகிப்பார் என்றும், புதிய அமைச்சர் பதவியேற்பு நிகழ்ச்சி இன்றுமாலை 6.30 மணிக்கு ஆளுநர் மாளிகையில் நடைபெறும் என செய்திக் குறிப்பில் தெரிவிக்கப்பட்டுள்ளது.