சுதந்திரதினத்தையொட்டி மதுரையில் முக்கிய இடங்களில் கூடுதல் பாதுகாப்பு

நாட்டின் 68–வது சுதந்திர தினம் வருகிற 15–ந்தேதி கொண்டாடப்படுகிறது. அனைத்து பகுதிகளிலும் சுதந்திர தின கொண்டாடட்டங்கள் வெகுசிறப்பாக நடத்தப்படும். இதையொட்டி அசம்பாவிதங்களை தவிர்க்கும் வகையில் முன்னெச்சரிக்கை நடவடிக்கைகளை போலீசார் எடுத்து வருகிறார்கள்.
மதுரையில் சுதந்திர தினவிழா கொண்டாட்டத்தையொட்டி முக்கிய இடங்களான மீனாட்சி அம்மன் கோவில், ரெயில் நிலையம், விமான நிலையம் மற்றும் முக்கிய வழிபாட்டு தலங்கள், அரசு அலுவலகங்களில் கூடுதல் பாதுகாப்பு ஏற்பாடுகள் செய்யப்பட்டுள்ளன.
சோதனை சாவடிகளிலும் போலீசார் உஷார் படுத்தப்பட்டு வாகன சோதனைகளும் முடுக்கி விடப்பட்டுள்ளது. போலீசார் தீவிர ரோந்து பணியிலும் ஈடுபட்டு வருகிறார்கள்.
தீவிரவாதிகளால் அடிக்கடி மிரட்டல்கள் வரும் மீனாட்சி அம்மன் கோவிலில் பாதுகாப்பு ஏற்பாடுகள் பலப்படுத்தப்பட்டுள்ளன. பக்தர்கள் வருகையை வீடியோவில் பதிவு செய்யயப்படுகிறது.
பக்தர்கள் கொண்டுவரும் பொருட்கள், பலத்த சோதனைக்கு பின்னரே அனுமதிக்கப்படுகிறது.
மதுரை ரெயில் நிலையத்திலும் போலீசார் தீவிர கண்காணிப்பில் ஈடுபட்டு உள்ளனர். பயணிகள் கொண்டுவரும் உடமைகள் சோதனைக்கு பின்னரே அனுமதிக்கப்படுகிறது. மேலும் மதுரைக்கு வரும் ரெயில்கள், புறப்படும் ரெயில்களிலும் அடிக்கடி சோதனை நடத்தப்பட்டு வருகிறது.
ரெயில் மூலம் பார்சல் அனுப்புவதிலும் அசம்பாவிதங்களை தவிர்க்கும் வகையிலும் நாளை (13–ந் தேதி) முதல் 16–ந்தேதி வரை தடை விதிக்க ரெயில்வே நிர்வாகம் முடிவு செய்துள்ளது. இதற்கான அறிவிப்பு இன்று மாலை வெளியிடப்படும் என்று ரெயில்வே போலீசார் தெரிவித்தனர்.