அலங்காநல்லூரில் தீயணைப்பு நிலையம்: முதல்–அமைச்சருக்கு கருப்பையா எம்.எல்.ஏ. நன்றி

அலங்காநல்லூர் பகுதிக்கு தீயணைப்பு நிலையம் ஒதுக்கீடு செய்த முதல்–அமைச்சருக்கு கருப்பையா எம்.எல்.ஏ. நன்றி கூறினார்.
மதுரை மாவட்டம், சோழவந்தான் சட்டமன்ற தொகுதிக்கு உட்பட்ட அலங்காநல்லூர் பகுதியில் பொதுமக்களின் நீண்டநாள் கோரிக்கையை ஏற்று தீயணைப்பு நிலையம் அமைத்திட உத்தரவு வழங்கிய முதலமைச்சருக்கு சட்ட சபையில் கருப்பையா எம்.எல்.ஏ. நன்றி தெரிவித்து பேசினார்.
மேலும் அவர் பேசியதாவது:–
சோழவந்தான் ரெயில்வே மேம்பாலம் அமைப்பதற்கு 36 கோடி ரூபாயும், அலங்காநல்லூர் சார்பு பதிவாளர் அலுவலகம் கட்ட ரூ.50 லட்சமும், விவசாயிகள் நீண்டநாள் கோரிக்கையான சிதிலமடைந்த வைகை பெரியாறு கிளை கால் வாய்களை புணரமைப்பு செய்வதற்காக ரூ.26 கோடியும், அலங்காநல்லூர் தேசிய கூட்டுறவு சர்க்கரை ஆலையில் நீண்ட நாள் பணிபுரிந்த 61 தற்காலிக தொழிலாளர்களை பணி நிரந்தரம் செய்ததற்கு தனது நன்றியை சோழவந்தான் தொகுதி மக்கள் சார்பாக தமிழக முதலமைச்சர் அவர்களுக்கு தெரிவிப்பதாக பேசினார்.
தொடர்ந்து சோழவந்தான் தொகுதிக்கு உட்பட்ட ஆண்டிபட்டி ஊராட்சியில் உள்ள 2 ஏக். 40 செண்ட். அரசு புறம்போக்கு நிலத்தில் அலங்காநல்லூர் மற்றும் வாடிப்பட்டி ஒன்றியங்கள் இணைகின்ற இடத்தில் கூடுதல் துணைமின் நிலையம் அமைத்திட வேண்டி கோரிக்கை விடுத்து பேசினார்.
அதற்கு பதிலளித்த மின்துறை அமைச்சர் நத்தம் விசுவநாதன் கூறியதாவது சட்டபேரவை உறுப்பினர் வேண்டுகோளுக்கிணங்க மின்தேவையைக் கருத்தில் கொண்டு வருங்காலத்தில் அதிகரிக்கும் மின்தேவையை கவனத்தில் கொண்டு அரசின் நிதிநிலைக்கேற்ப துணைமின் நிலையங்களை சீரமைத்திடவோ, புதியதாக மின்நிலையம் அமைப்பதற்கான ஆய்வுகள் மேற்கொள்ளப்படும் என்றார்.
அதேபோல் அலங்கா நல்லூர் அருகே சின்ன இலந்தைகுளம் கிராமத்தில் உள்ள 27 ஏக். அரசு புறம்போக்கு மேய்ச்சல் தரிசு நிலம் உள்ளது. இதில் அரசு கால்நடை மருத்துவ கல்லூரி அமைத்திட வலியுறுத்தி சட்டசபையில் கருப்பையா எம்.எல்.ஏ. பேசினார். கடந்த 3 ஆண்டுகளில் சோழவந்தான் சட்டமன்ற தொகுதி மேம்பாட்டிற்காக அதிகளவில் நிதி ஒதுக்கீடு செய்த முதலமைச்சருக்கு மீண்டும் நன்றி தெரிவிப்பதாக பேசினார்.