வாக்காளர் பட்டியலில் பெயர் சேர்க்க விண்ணப்பித்தவர்களின் வீடுகளில் ஆர்.டி.ஓ. நேரில் விசாரணை

தாராபுரம் பகுதியில் வாக்காளர் பட்டியலில் பெயர் சேர்க்கும் விண்ணப்பங்கள் கடந்த 10–ந் தேதி வரை அந்தந்த வாக்குச்சாவடிகளில் பெறப்பட்டன. அப்போது வாக்காளர் பட்டியலில் பெயர் இல்லாதவர்கள், தங்களது பெயரை வாக்காளர் பட்டியலில் சேர்க்க படிவம் 6–ஐ பூர்த்தி செய்து கொடுத்தனர். அந்த விண்ணப்பத்தில் பூர்த்தி செய்த முகவரி உண்மையானது தானா? என்று அதிகாரிகள் நேரில் சென்று விசாரித்து வருகிறார்கள்.

அந்த வகையில் தாராபுரத்தில் வாக்காளர் பட்டியலில் பெயர் சேர்க்க விண்ணப்பித்தவர்களின் வீடுகளுக்கு ஆர்.டி.ஓ. சரவணமூர்த்தி, தாசில்தார் ஆறுமுகம் ஆகியோர் நேற்று திடீரென்று சென்று, விண்ணப்பத்தில் பூர்த்தி செய்த முகவரிக்கும், தற்போது குடியிருக்கும் முகவரிக்கும் முரண்பாடு உள்ளதா? அது உண்மையான முகவரிதானா? என்றும், விண்ணப்பத்துடன் இணைத்துள்ள ஆவணங்களின் உண்மை தன்மை குறித்தும் விசாரணை செய்தனர்.