ஒத்தக்கடை அருகே காலையில் திருமணம்: இரவில் மணமகன் தற்கொலை

மதுரை மாவட்டம் ஒத்தக்கடை அருகே உள்ள மாங்குளம் கிராமத்தை சேர்ந்தவர் ஜீவா (வயது29), ஆட்டோ டிரைவர். இவருக்கும் ஒரு பெண்ணுக்கும் நேற்று காலை திருமணம் நடைபெற்றது.
திருமணத்திற்கு பின் கல்யாண வீடு களை கட்டி காணப்பட்டது. விருந்துண்ட பலரும் மாலையில் வீடு திரும்பினர்.
புதுமண தம்பதியர் வாழ்வை மகிழ்ச்சியாக தொடங்க அனைவரும் வாழ்த்து கூறி சென்றனர்.
இந்த நிலையில் இரவில் புதுமாப்பிள்ளை ஜீவாவை திடீரென காணவில்லை என புதுப்பெண் தெரிவித்தார். இதனை தொடர்ந்து உறவினர்கள் வீடு முழுக்க தேடினர். அப்போது வீட்டின் பின்புறம் உள்ள ஒரு மரத்தில் அவர் தூக்கில் தொங்குவதை கண்டு அதிர்ச்சி அடைந்தனர்.
இது குறித்த தகவல் கிடைத்ததும் ஒத்தக்கடை போலீஸ் இன்ஸ்பெக்டர் அப்துல்காதர் மற்றும் போலீசார் விரைந்து சென்று தற்கொலை செய்த புதுமாப்பிள்ளை ஜீவா உடலை மீட்டு அரசு ஆஸ்பத்திரிக்கு அனுப்பி வைத்தனர். திருமணத்தன்றே அவர் தற்கொலை செய்து கொண்டது ஏன்? என்பது ‘மர்ம’மாக உள்ளது.
இது குறித்து போலீசார் தீவிர விசாரணை நடத்தி வருகின்றனர்.