மதுரையில் காதலர் தின அட்டையை எரித்த 50 பேர் கைது

உலகம் முழுவதும் இன்று காதலர் தினம் கொண்டாடப்பட்டு வருகிறது. இதற்கு சில நாடுகளில் ஆதரவும், சில நாடுகளில் எதிர்ப்பும் இருந்து வருகிறது. இந்தியாவில் காதலர் தினத்துக்கு பல அமைப்புகள் எதிர்த்து வருகின்றன.
காதலர் தினமான இன்று மதுரையில் ஆர்ப்பாட்டம் நடந்தது. மதுரை பெரியார் பஸ் நிலையம் கட்டபொம்மன் சிலை அருகில் தேவர் தேசிய பேரவை சார்பில் ஆர்ப்பாட்டம் நடந்தது. இதற்கு மாவட்ட தலைவர் சுமன் தலைமை தாங்கினார். மாவட்ட செயலாளர் சிவா, நிர்வாகிகள் சரவணன், சித்தன், ரமேஷ் உள்பட 20–க்கும் மேற்பட்டோர் கலந்து கொண்டனர். இவர்கள் காதலர் தினத்தை கண்டித்து கோஷமிட்டனர்.
மேலும் ஆர்ப்பாட்டத்தில் பங்கேற்று காதலர் தின வாழ்த்து அட்டைகளை எரித்து தங்களது எதிர்ப்பு தெரிவித்தனர். போராட்டம் நடத்திய 20 பேரை போலீசார் கைது செய்தனர். சிறிது நேரத்தில் அதே இடத்தில் இந்து இளைஞர் பேரவை சார்பில் காதலர் தினத்தை கண்டித்து ஆர்ப்பாட்டம் நடந்தது. மாவட்ட தலைவர் அசோக்குமார் தலைமையில் 25–க்கும் மேற்பட்டவர்கள் இதில் கலந்து கொண்டனர்.
ஆர்ப்பாட்டத்தில் பங்கேற்றவர்கள் முகமூடி அணிந்து காதலர் தினத்தை கண்டித்து கோஷமிட்டனர். இதையடுத்து இவர்களையும் போலீசார் கைது செய்தனர்.