வேலை நீக்கம் செய்யப்பட்ட மத்திய அரசு ஊழியர் மனைவி–குழந்தையுடன் போராட்டம்

மத்திய அரசின் பூச்சியியல் ஆராய்ச்சி மையத்தில் ஊழியராக வேலை பார்த்தவர் சதீஷ்பாபு. எம்.எஸ்சி பட்டதாரியான இவர் சமீபத்தில் பணியில் இருந்து நீக்கப்பட்டார். அதை கண்டித்தும், தனக்கு பின் பணியில் சேர்ந்தவர்களுக்கு பணியை தொடர வாய்ப்பு கொடுத்து விட்டு தன்னை பழிவாங்குவதாக கூறியும் அவர் நேற்று போராட்டத்தில் குதித்தார்.
சதீஷ்பாபு தன் மனைவி நாகலட்சுமி மற்றும் குழந்தையுடன் மதுரை சின்னசொக்கிகுளம் சரோஜினி தெருவில் உள்ள மத்திய பூச்சியியல் ஆராய்ச்சி அலுவலகத்திற்கு வந்தார். அலுவலகம் முன்பு அவர் மனைவி, குழந்தையுடன் உண்ணாவிரத போராட்டம் தொடங்கினார்.
தகவல் அறிந்து போலீசார் அங்கு வந்து அவரை சமரசம் செய்ய முயன்றனர். ஆனாலும் போராட்டத்தை கைவிட மறுத்தார். அதைத்தொடர்ந்து அலுவலக வாசலை மறைக்காமல் ஓரமாக சென்று அமரும் படி போலீசார் கூறினார்கள். அதன்படி அலுவலகம் அருகில் அவர் குடும்பத்துடன் போராட்டம் நடத்தினார்.