மதுரையில் நடந்த பட்டதாரி ஆசிரியர் கவுன்சிலிங்கில் மணக்கோலத்தில் பங்கேற்ற ஜோடிகள்

ஆசிரியர் தகுதி தேர்வில் வெற்றி பெற்றவர்களுக்கு பணி நியமன கவுன்சிலிங் நடைபெற்று வருகிறது. மதுரையில் செனாய் நகரில் உள்ள இளங்கோ மேல்நிலைப்பள்ளியில் கவுன்சிலிங் நடைபெற்று வருகிறது. இன்று நடந்த கவுன்சிலிங்கில் 500–க்கும் மேற்பட்டோர் கலந்து கொண்டனர்.
மதுரை மாவட்டம் பெருங்காமநல்லூரைச் சேர்ந்தவர் பாண்டீஸ்வரி. இவருக்கும், வேல்முருகன் என்பவருக்கும் இன்று திருமணம் நிச்சயிக்கப்பட்டு இருந்தது.
இந்த நிலையில் ஆசிரியர் தகுதி தேர்வில் தேர்ச்சி பெற்றுள்ள பாண்டீஸ்வரி இன்று கவுன்சிலிங்கிற்கு அழைக்கப்பட்டு இருந்தார்.
திருமண நாளிலேயே கவுன்சிலிங்கிற்கு அழைக்கப்பட்டு இருந்ததால் பாண்டீஸ்வரி–வேல்முருகன் திருமணம் காலையில் நடந்தது. திருமணம் முடிந்த உடனேயே மணக்கோலத்தில் பாண்டீஸ்வரி தனது கணவருடன் ஆசிரியர் பணி நியமன கவுன்சிலிங்கில் கலந்து கொண்டார்.
இதேபோல் ஆசிரியர் தகுதி தேர்வில் வெற்றி பெற்ற தல்லாகுளத்தைச் சேர்ந்த கார்த்திகாவுக்கும் இன்று திருமணம் நிச்சயிக்கப்பட்டு இருந்தது.
அதன்படி கார்த்திகா– முத்துகிருஷ்ணன் திருமணம் பூங்கா முருகன் கோவிலில் நடந்தது. பின்னர் அவர்கள் மணக்கோலத்தில் கவுன்சிலிங்கில் கலந்து கொண்டனர்.