காங்கயம் அருகே கட்டிடத்தொழிலாளி வீட்டில் விளக்கு பற்றவைத்த போது நடந்த தீ விபத்தில் காயமடைந்து சிகிச்சை பெற்று வந்த தாயும், மகளும் பரிதாபமாக இறந்தனர்

காங்கயம் அருகேயுள்ள வீணம்பாளையம் என்ற ஊரை சேர்ந்தவர் சுரேஷ் (வயது40). கட்டிட தொழிலாளியான இவரும், இவரது மனைவி மணிமேகலை (35) ஆகிய இருவரும் கடந்த மாதம் 17–ந்தேதி காங்கயத்தில் நடந்த வாரச்சந்தைக்கு சென்று பொருட்கள் வாங்கிகொண்டு மாலையில் வீட்டிற்கு திரும்பினர்.
வீட்டில் மின்சார வசதி இல்லாததால் சுரேஷ் மண்எண்ணெய் ஊற்றி சிம்னி விளக்கை பற்றவைத்தார். அப்போது எதிர்பாராதவிதமாக சுரேஷ் மற்றும் அவரது அருகில் இருந்த அவரது மனைவி மணிமேகலை, அவர்களது மகள் தீட்சா (3) அவர்களது உறவுக்கார குழந்தையான ராஜா (5) ஆகிய நான்கு பேர் மீது தீப்பற்றியது. இதில் நான்கு பேரும் படுகாயமடைந்தனர்.

உடனடியாக அவர்கள் அனைவரும் காங்கயம் அரசு ஆஸ்பத்திரிக்கு கொண்டு செல்லப்பட்டு பின்பு மேல் சிகிச்சைக்காக கோவை அரசு ஆஸ்பத்திரிக்கு கொண்டு செல்லப்பட்டு தொடர்ந்து கோவை சிகிச்சை அளிக்கப்பட்டு வந்தது. இந்த நிலையில் சிகிச்சை பலன் அளிக்காமல் கடந்த 22–ந்தேதி தீட்சா பரிதாபமாக இறந்து போனார். நேற்று முன்தினம் மாலை அவரது தாயார் மணிமேகலையும் சிகிச்சை பலன் இன்றி இறந்து போனார். தற்போது சுரேஷ் மற்றும் அவரது தங்கை மகன் ராஜாவும் தொடர்ந்து சிகிச்சை பெற்று வருகின்றனர்.
இந்த சம்பவம் குறித்து ஊதியூர் போலீசார் வழக்குப்பதிவு செய்து விசாரணை நடத்தி வருகின்றனர்.