கள்ளக்காதலியுடன் ஊர் சுற்றிய கல்லூரி ஊழியர்: போலீசில் ஒப்படைத்த மனைவி

தூத்துக்குடி டி.என்.டி. காலனியை சேர்ந்தவர் சுதாகர். இவரது மனைவி எஸ்தர் பாலா (வயது38). இவர்களுக்கு திருமணமாகி ஒரு மகள் உள்ளார். இந்நிலையில் கடந்த 2010ம் ஆண்டு சுதாகர் உடல்நிலை பாதிக்கப்பட்டு இறந்து விட்டார்.

       இதையடுத்து கடந்த 10.7.2015 அன்று மெஞ்ஞானபுரத்தை சேர்ந்த கல்லூரி ஊழியரான வின்சென்ட் பாஸ்கர் (37) என்பவருடன் எஸ்தர் பாலாவுக்கு 2–வது திருமணம் நடைபெற்றது. அப்போது பெண் வீட்டில் இருந்து 4 பவுன் நகைகள், 1½ லட்சம் ரொக்க பணம் ஆகியவை சீர்வரிசையாக கொடுக்கப்பட்டது.

திருமணமான 17–வது நாளில் வின்சென்ட் பாஸ்கர் வேலைக்கு செல்வதாக கூறிவிட்டு வெளியே சென்றார். பின்னர் அவர் வீடு திரும்பவில்லை. இதனால் அதிர்ச்சியடைந்த எஸ்தர் பாலா தனது கணவரை அக்கம் பக்கம் தேடி வந்தார்.

இந்த நிலையில் எஸ்தர் பாலா தனது உறவினர்களுடன் நெல்லையில் உள்ள ஒரு ஜவுளிக்கடைக்கு வந்திருந்தார். 

          அப்போது அங்கு கணவர் வின்சென்ட் பாஸ்கர் வேறோரு பெண்ணுடன் சுற்றி திரிவதை கண்டு அதிர்ச்சியடைந்து உறவினர்களுடன் கூறினார். உடனே அவர்கள் அனைவரும் சேர்ந்து வின்சென்ட் பாஸ்கரை மடக்கி பிடித்து புதுக்கோட்டை அனைத்து மகளிர் போலீசில் ஒப்படைத்தனர்.

அப்போது எஸ்தர் பாலா கணவர் மீது நடவடிக்கை எடுக்க வேண்டும் என புகார் செய்தார். போலீசார் வழக்குப் பதிவு செய்து விசாரணை நடத்தினர். விசாரணையில் வின்சென்ட் பாஸ்கர் ஏற்கனவே ஜெயந்தி, அருமை பொருட்செல்வி, சாந்தி, அனிதா ஆகிய 4 பேரை திருமணம் செய்திருப்பதும் 5–வதாக எஸ்தர் பாலாவை ஏமாற்றி திருமணம் செய்ததும் தெரியவந்தது. இதையடுத்து வின்சென்ட் பாஸ்கர் மற்றும் திருமணத்திற்கு உடந்தையாக இருந்த புரோக்கர் திசையன் விளையை சேர்ந்த ஜான் இன்பராஜ் ஆகிய இருவரையும் போலீசார் கைது செய்தனர்.