திருப்பூர் சாயப்பட்டறையில் ரூ.50ஆயிரம் மதிப்புள்ள பனியன் ரோல்கள் திருட்டு

திருப்பூர் அனுப்பர்பாளையத்தை அடுத்துள்ள ஆத்துப்பாளையம் ஐ.ஜி.தோட்டம் பகுதியை சேர்ந்தவர் கோவிந்தசாமி. இவரது மகன் புஷ்பராஜ் (42). இவர் இதே பகுதியில் சாயப்பட்டறை வைத்து நடத்தி வருகிறார். திருப்பூரில் உள்ள பனியன் நிறுவனங்களில் இருந்து ஆர்டரின் பேரில் பெற்று பனியன் ரோல்களுக்கு சாயப்பட்டறையில் சாயமேற்றி கொடுத்து வருகிறார். இந்த நிலையில் நேற்று முன்தினம் பனியன் ரோல்களுக்கு சாயமிட்டு சாயப்பட்டறையின் முன்புறம் காலி இடத்தில் உள்ள கம்பிகளில் 48 பனியன் ரோல்களை காய போட்டிருந்தார்.

நேற்றுக்காலை வந்து பார்த்தபோது 40 பனியன் ரோல்கள் மட்டுமே இருந்தது. இரவில் யாரோ மர்ம மனிதர்கள் 8 பனியன் ரோல்களை திருடிச்சென்று விட்டனர். இதன் மதிப்பு ரூ.50 ஆயிரமாகும். சாயப்பட்டறையில் பொருத்தி இருந்த சி.சி.டிவி.கேமராவில் பார்த்தபோது மர்ம நபர்கள் ஒரு காரில் வந்து சென்றது பதிவாகி இருந்தது. இது குறித்து 15.வேலம்பாளையம் போலீசார் வழக்கு பதிவு செய்து சாயப்பட்டறையில் காயப்போட்டிருந்த பனியன் ரோல்களை திருடிச்சென்ற மர்ம மனிதர்களை தேடி வருகிறார்கள்.